Rev 20 | ZomZIV | STEP | Tua ciangin vansawltak khat vantung pana hong paikhiasuk ka mu a, amah in Kawhawmpi honna tawhtang nei-in, a khut ah sikkhainiang lianpi khat a tawi hi.

Revelation of John 20

Kum Tul

1 Tua ciangin vansawltak khat vantung pana hong paikhiasuk ka mu a, amah in Kawhawmpi honna tawhtang nei-in, a khut ah sikkhainiang lianpi khat a tawi hi. 2 Amah in tua tanglai gulpi, Satan ahikeh dawimangpa, gulpi-sikhiam mana, kum tulkhat sung a khih hi. 3 Amah in Kawhawmpi sungah lawn a, minamte a khem nawn loh nadingin kum tulkhat a bei mateng, tawh kalh khuma, a tungah seal in a ciamteh hi. Tua hun khit ciangin amah tomkha sung a kikhahkhia pelmawh ding hi.

4 Thukhen za a kipiasate tutna, kumpi tokhomte ka mu hi. Tua ciangin Jesu adinga teci pangte le Pasian thu teci a panna uh hanga a ngawng uh a kitante kha ka mu hi. Amaute in gamsa ahikeh a lim bia loin ama ciamtehna a tal tung ahikeh a khut tunguah a ngah kei uh hi. Amaute nungta uh a, Christ tawh kum tulkhat sung a uk uh hi. 5 (Kum tulkhat a bei mateng a om lai mi sisate a nungta nai kei hi.) Hih in a masa thawhkikna ahi hi. 6 A masa thawhkikna sunga kihelte a siangtho le thupha ngahte ahi uh hi. Amaute tungah sihna nihna in vangliatna a nei nawn kei hi. Ahi hangin amaute, Pasian le Christ siampite hi ding uh a, kum tulkhat sung amah tawh a uk khawm ding uh hi. ^a

Satan Siatna

7 Kum tulkhat a bei khit ciangin, Satan a thongkiatna pan kikhahkhia-in, 8 leitung kiuli-a minamte khem dingin kuankhia dinga Gog le Magog kidona adingin amaute a kaikhawm ding hi. Amaute tuipi gei-a sehnel zah pha uh hi. 9 Amaute leitung maitang dimin pai uh a, Pasian mite giahphual, a it a khuapi a umcih uh hi. Ahi hangin van panin meikuang hong tuaksuk a, amaute kangtummang hi. 10 Amaute a khem tua dawimangpa gamsa le kamsang zuaute a kipaihna kaat kuang lipi sungah a kilawn hi. Amaute sun le zanin a tawntung gawtna kithuaksak den ding hi. ^b

Misite Thu Kikhen

11 Tua ciangin alian akang kumpi tokhom le a tunga tupa ka mu hi. Ama mai-ah van le lei om nading mun om lo ahi manin a taimang hi. 12 Tua ciangin misite, aneu alianin kumpi tokhom mai-a ding le laibute kilem ka mu hi. Nuntakna laibu ahi laibu dang khat a kilem hi. Misite tungah a hihsate uh laibute sunga kigelhsa tawh kizui-in thu kikhen hi. 13 Tuipi in a sunga om misite puakkhia a, sihna le Gawtmun in amau sunga om misite puakkhia-in, mi khempeuh amau nasepna tawh kizui-in thu kikhen ciat hi. 14 Tua ciangin meili sungah sihna le Gawtmun kipai hi. Tua meili sihna nihna ahi hi. 15 Nuntakna laibu sunga a min kigelh lo peuhmah meili sungah kipai hi. ^c